24 C
id

INGEK I BADAN


(Srk dari kampuang II)

Malayang pulo surek ka duo
Dari kampinuang kami kirimkan
Kok nyampang dagang sakik talingo
Batin kok lai mandangakan

Tangah malam pukua duo baleh
Tasintak ayah tajago
Ayah caliak di pandangi mandeh
Sadang ba urai ayie mato

Lah malang mandeh baparak
Tumbuah sarumpun babuah ampo
Malang bana kami baranak
Anak banyak larek sadonyo

Indak manulak nasib suratan
Bukan manyasa pado untuang
Anang angkek nan urang gadangkan
Labiah bak cando anak kanduang

Buruaknyo nasib kok di sabuik
Jarieh bak raso sio sio
Bak batu jatuah kalauik
Hilang ndak tantu lubuaknyo

Lai dicari bijo nan baiak
Di piliah pulo tanah ka ladang
Lah tibo musim ma ambiek
Buah jatuah ka parak urang

Kami tapaga karambie condoang
Tungguanyo sajo nan baratoki
Ka ditabang tanaman joloang
Di biakan maracun hati

Santano lai babuah labek
Lai kasanang urang ma ambiak
Tapi kok cando ampo barek
Tampan ka jadi umpan itiak

Itu di kami nan ma mabuak
Bukan manuntuik jaso baparak
Dagang kok cando antimun bungkuak
Ka karuang lai, dihituang indak

Guno tak lain ka panambah
Panukuak barang nan usak
Ka ta makan antah lah antah
Antah ka busuak dek taleak

Sadang kuat urang katuju
Tanago abih uranglah anggan
Nasib bak cando ganja batu
Sayang malakik oto jalan

Dek ameh sagalo kameh
Dek padi sagalo jadi
Kayo abih jaso kok laleh
Isuak dagang ba ibo hati

Sabalun nan baiak kito kaji
Nan buruak dulu kito baco
Usah turuikkan kato hati
Dayo syetan banyak caronyo

Banci bukan berangpun bukan
Hutang dek kami ma ingeki
Ibarat talalok kami jagokan
Jan sampai tasintak harilah tinggi

Sabab baitu kami sabuik
Jan sampai dagang bak kudo baban
Dek harok rumpuik sarajuik
Sabendi urang dagang ba elokan

Ingek ingek sabalun kanai
Bakulimek sabalun abih
Rantau jauah dagang kok sansai
Tabayang kampuang taserak tangih

Satinggi tinggi tabang bangau
Ka kubangan juo ka hinggoknyo
Ka ujuang dunia tampuah lah rantau
Nan kampuang usahlah lupo

Kok latieh tabang malayok
Tagarak di hati nak baranti
Caliek caliek ka bakeh hinggok
Jarek sarupo jo jarami

Caliak batang pandangi dahan
Rantiang badagok nan ka dipilieh
Sabalun kuku di cacahkan
Kana jarek ka mancakiak Mariah

Kok lai kanai parangkok gatah
Kanai bulu dapek rarak i
Tapi kok kanai di banang lawah
Tampan bakujuik sampai mati

Ibarat urang manggaleh
Usah lah untuang nan kito baco
Kok labonyo bialah tandeh
Nan pokoknyo jan tabao pulo.

Kami ndak bosan kamanyabuik
Walau dagang ka sakik hati
Tangguang jawab kami samaso hiduik
Ka di tanyo nyampang kok mati.

Lereang marapi,2308 1994.
Y.Jambak

KATO HATI

Indak balabihan doh rasonyo
Kalau hati sadang sanang
Jauah silang jo sangketo
Lenggang lapeh langkah pun panjang

Indak ado aral malintang
Luruih rasonyo jalan
Banyak talompek kato saying
Rela jo ma’af baserakkan

Muluik manih kucindan murah
Baso elok laku katuju
Sanjuang jatua puji tatumpah
Budi marangkak tiok bulu

Mabuak bagarah bakucikak
Gilo bagurau bakucindan
Galak urang galak awak
Walaupun awak nan urang galakkan

Duduak surang menyengeang juo
Kononlah pulo barami-rami
Kok datang upek caci jo caco
Dapek malam lah hilang pagi

Baitu bana lapangnyo dado
Indak doh ciek nan manyingguang
Kafilah balalu juo
Bialah anjiang nak manggonggong

Walau karajo basimbah paluah
Barek tak kunjuang di raso
Makan lamak lalok bakaruah
Ka balakang lasuah pulo

Kurang sehat taraso badan
Sakuih balakang kampih pulo
Jo galak rusua bahalaukan
Hilangkan jo garah sapaduo


Lamah lambuik kato di muluik
Lunak gigi pado lidah
Sasek malangkah capek suruik
Bialah salangkah kalah

Tapi… kok hati sadang sampik
Sasak rasonyo dunia
Mancaliak urang sabalik
Rasonyo sadang mancabia

Lenggang tangguang langkah tak sampai
Angan lalu paham tatumbuak
Tiok di awai tagurajai
Bak tapacik kayu lapuak

Duduak antah tagak pun antah
Di bao lalok antah juo
Angguak salah manggeleang salah
Urang salah aniang salah juo

Urang batanyo elok-elok
Sumbang juo tadanganyo
Tabik gigia kalua paluah
Di talanjangi urang badan rasonyo

Labiah bak cando sakik gigi
Indak nan elok ciek juo
Mandanga urang banyanyi
Rasonyo baturo-turo

Tasingguang labiah bak kanai
Talinteh labiah talendo
Bara bana urang manjujai
Cimeeh juo nan taraso

Salah urang sabijo bayam
Taraso sagadang kundua
Tabik banci timbua dandam
Raso tak mungkin tangih di lipua

Makan didulang duduak dikasua
Galeh lah untuang lipek duo
Litak tak kanyang ikua malatua
Rugi juo nan taraso

Itulah ibarat jo umpamo
Indak dapek kito pungkiri
Sifat kito rato-rato
Baitu bana nan tajadi

Dihati latak latak kuncinyo
Caminan diri manusia
Elok jo buruak kok tasuo
Disitu bayang nampak kalua

Kalau hati nan lah rusak
Kamuko mambayang rono
Bak bacamin kaco ratak
Haram nan rancak ka basuo

Rusak anggoto kasadonyo
Kalau hati nan lah sakik
Mato kabua pakak talingo
Saluruih badan rangkik-rangkik

07232002 : Yanto Jambak
Postingan Lama
Postingan Lebih Baru

Posting Komentar

- Advertisment -
- Advertisment -