24 C
id

GURINDAM


Oleh: Edi Ramadhan Dt. Sompono Basa

Sabalum gurindam pambukaan, nan banamo Dayang Daini/Minangkabau nan sarancaknyo anak randai masuak dari lua ka dalam galanggang jo balabek silek, walau buliah juo babarih sajo sambia batapuak tangan. Satibo di dalam galanggang mambuek sambah silek sasuai jo silek nan ado, mungkin juo bisa disambia-an sambah ka panonton untuak ampek suduik. Sudah tu baru mulai gurindam pambuka-an.

GURINDAM PAMBUKAAN
Ampun baribu kali ampun, rila jo maaf dikandak-i, rundiang jo langkah kok nyo ragu. Nan mananti urang panyantun, kami nan datang bagadang hati, itu nan tuah di pangulu

Di ........... randai disusun, di dalam kota/kab …...., di ............ sasaran kami, sapuluah jari kami susun, pado panonton nan basamo, randai dimulai hanyo lai

Ap...Tah...Tih…

Keterangan
Kato-kato untuak gurindam Dayang Daini nan di ateh ko, tadiri dari duobaleh barih, tabagi pulo dari ampek kalompok. Ciek kalompok tadiri pulo dari tigo barih, kasadonyo tu buliah diganti atau dituka samo sakali jo nan ado ditampek sasaran kito surang-surang, atau dituka jo nan diajaan guru di sasaran kito. Kalau nan iko ka dipakai, mako pado titiak-titiak nan ado tu ditambah jo namo nagari namo kota atau kabupaten, baru kudian namo jorong tampek sasaran kito barandai. Kalau gurindam Dayang Daini ko alah salasai dilaguan, mako sasudah gurindam Dayang Daini, anak randai dibao tagak dek tukang gore untuak mambuek legaran, kalau bisa sambia manampak-an langkah silek. Sasudah anak randai duduak, barulah masuak sapatah kato atau sakapua siriah. Di bawah ko, kito mambuek-an pangkanyo sajo, tambahannyo tasarah kapado palatiah randai di daerah kito surang-surang, atau buliah juo diganti samo sakali, ijan tapaku kapado nan alah diagiahan contohnyo, dek adaik salingka nagari.

SAPATAH KATO/SAKAPUA SIRIAH

Assalamu’alaiku wr. Wb.
Mano panonton nan basamo
Iyolah datuak jo pangulu
Sarato alim jo ulama
Baiak pun manti jo pandito
Langkok sagalo cadiak pandai
Nan mudo arih budiman
Hulu balang pagaran kokoh
Bundo kanduang samo di dalam
Dalam saruan kami juo
Gadang indak tasabuik gala
Ketek indak taimbau namo
Dilingkuang sambah kasadonyo

…tambah nan katuju…
………………………………...

Hap...Tah ...Tih…

Sasudah sapatah kato/sakapua siriah, anak randai dibao tagak dek tukang gore jo galombang/balabek silek. Kutiko anak randai alah bajalan dalam legaran baru disambuang jo gurindam legaran nan partamo, biasonyo simarantang namo lagunyo, buliah nan randah atau nan agak tinggi, nan baujo mamulainyo.

GURINDAM LEGARAN 1
Nan akiraik kasalamonyo, sipaek iman tahan dayoan, warih dek datuak nan baduo, dimintak sunyi nan basamo, nak kami bukak pakabaran, iyo ka diri Umbuik Mudo. Umbuik Mudo kami curaikan, jo diri Puti Galang banyak, anak rang ranah kampuang aua, pado wakatu maso itu, tunbuah pikiran dek mandehnyo, takana anak nan lah gadang. Dek si Umbuik bak cando ragu, bujang diimbau dek mandehnyo, sadang bahandai jo babincang.

Ap…Tah...Tih...

KETERANGAN
Sabalun anak randai nan balegaran duduak, mandeh jo ayah si Umbuik Mudo alah masuak ka dalam legaran. Untuak si Umbuik Mudo kalau inyo sato bamain dalam legaran, inyo tagak sasudah diimbau dek mandehnyo, buliah dianta jo tapuak tangan sajo, kalau Umbuik Mudo indak sato main dalam legaran, Umbuik Mudo tatap barado dilua legaran, mako sasudah diimbau dek mandehnyo baru masuak ka dalam. Untuak mampasingkek wakatu, Umbuik Mudo alah siap di tapi legaran, untuak ma-antanyo masuak caronyo tatap samo, buliah jo tapuak tangan sajo kalau wakatu singkek, buliah juo jo galombang silek kalau wakatu cukuik panjang, sudah tu baru bakato-kato.

MANDEH UMBUIK MUDO (1-1)
Nak kanduang si Umbuik Mudo * Ubek jariah palarai damam
Anak kamari sakutiko * Kami nak barang dikatoan

UMBUIK MUDO (2-1)
Manolah mandeh kanduang ambo * Sarato ayah kanduang diri
Apokoh sabab karanonyo * Ambo diimbau musim kini
Ampun baribu kali ampun * Barilah maaf badan ambo
Jari sapuluah ambo susun * Kato bana disabuik juo

Dek ayah cubo bari tarang * Nak jan ambo bahati ragu
Hati di dalam naknyo sanang * Nak tampak jalan bakeh lalu
Rundiang tasarah pado ayah.

AYAH UMBUIK MUDO ( 3-1)
Nak kanduang si Umbuik Mudo * Mangkonyo anak kami imbau
Ado dek kami nan takana * Siang lah jadi angan-angan
Lah malam tak namuah lupo

Bak duri di dalam dagiang * Bak tulang dalam rakuangan
Kini taraso-raso juo * Danga dek Buyuang ayah tarangan
Buyuang kan dapek mampacamin * Aluran badan diri ayah
Liek pandangi lah dek anak * Ayah baransua tuo juo
Kok tuo lah bak tuo pisang * Mananti tabangan tibo

Kok mati ayah dek takadia * Ajalullah bilangan sampai
Dunia baraliah ka akiraik * Taganang aia panalakin
Tasirah tanah pangalian * Samalam maik dalam kubua
Ayah diupek urang juo * Sayang ka Buyuang alun sampai

Itulah sabab karanonyo * Mangko anak diimbau bana
Jan Buyuang tagamang isuak * Sapaningga ayah kok pai

Jan geneang karano budi * Jan cacek karano laku
Budi ditanai jo kurenah * Langkah dibidiak jo ilimu

Nan ilimu kito di Minang * Adaiknyo anam parakaro
Partamo cupak usali * Kaduo cupak buatan
Katigo kato pusako * Kaampek kato mupakaik
Kalimo kato daulu batapati * Kaanam kato kudian kato bacari

Di dalam adaik nan anam * Iyolah tabagi ampek
Partamo adaik dipakai * Nan kaduo cupak diisi
Katigo limbago nan dituang * Kalau (ki) to bilang nan kaampek
Jalan nan pasa nan baturuik * Labuah nan goloang nan batampuah
Suri tarantang nan batanun * Aia taganang nan basauak

Sabuah lai anak kanduang * Adaiknyo anak laki-laki
Di dalam alam Minangkabau * Iyo bana bak kato urang

Niniak mamak di pintu utang * Kamanakan di pintu baia
Mati ayah bakalang anak * Mati anak bakalang budi

Pambangkik batang tarandam * Panjapuik piutang lamo
Paapuih malu di kaniang * Panapiak mato padang
Ka panantang mato hari * Ka palawan dunia urang

Itunyo pasan dari ayah * Ba-apo pikiran Buyuang
Lahia jo batin nak jan guyah * Pataguah iman nak kanduang
Bapaham Buyuang tantang itu.

UMBUIK MUDO (4-1)
Mandanga pitua dari ayah * Padoman hiduik tiok hari
Sabarih indak ka diubah * Di simpan dalam runggo hati
Siang diambiak ka patungkek * Malam diambiak ka pakalang
Disimpai dikabek arek * Kapadoman malam jo siang

Kalau di badan diri ambo * Batimbang bumi jo langik
Bakumpa luluak jo karang * Kiamaik dunia nan piatu
Caia narako katujuahnyo * Ambo nan indak ragu lai
Ndak kalupo siang jo malam * Alah ka sanang hati ayah
AYAH UMBUIK MUDO (5-1)
Nak kanduang sibiran tulang * Palengah ibu jo bapo
Sanang hati bukan kapalang * Pangaja ayah batarimo

Sabuah lai anak kanduang * Nan takana-kana dek ayah
Dek rang minang suko marantau * Kok Buyuang karantau isuak
Garih nasib siapo tau * Ibati budi katajua
Sayangi paham ka tagadai * Langkah jan salelo kaki
Mahawai jan sapanjang tangan * Ingek awa kanalah akia
Hiduik di dunia ndak kalamo * Rago mananti pajanjian
Salangkah kaki balangkahan * Lah salangkah dunia nan tingga
Sakali angok diangok-an * Sa-angok akiraik kito jalang
Bogo dipikia walau indak * Ajalullah katibo juo

Danga di Buyuang bunyi pantun

Pancaringek di tapi aia * Lah mati mangko babuah
Ingek ingek anak balayia * Lauik sati rantau batuah

Alah kajaleh tu dek Buyuang

MANDEH UMBUIK MUDO (6-1)
Kok hanyo rundiangan ayah tadi * Ka tukuak tambahnyo dari mandeh
Bapadok hiduik di nagari * Kito jan urang pandang leceh

Nak kanduang si Umbuik Mudo * Kalau lah mandeh bapambari
Buyuang kan alun bausaho * Jalehan karajo kini-kini
Rundiangan ayah lah didanga * Kok nan adaik iyolah laku
Nan pusako iyolah kato * Kalau tapakai nan baitu
Kito tapuji salamonyo

Dibuek nan lamak di awak * Nan katuju pulo dek urang
Asah bakisa tampek tagak * Kito tasisiah samo gadang

Marangkuah tunggua ka dado * Rangkuahlah ka badan awak
Timbang ka badan urang lain * Kok nan kalamak di awak sajo
Nan diurang sagalo indak * Kito bacacek lahia batin

Kini baitu hanyo lai * Ka Buyuang rundiang disarahan
Piliah karajo nan katuju * Nak asah buek bapandangi
Bialah kami mamikia-an * Usah bak cando urang ragu
Apo pikiran anak kanduang

UMBUIK MUDO (7-1)
Rundiang talayang tantang alua * Bapikia ambolah ragu
Rumik bedo raso malulua * Mamiliah karajo nan katuju

Sabab baitu kato ambo * Manuruik pikiran ambo surang
Kalau ka jadi rang ka sawah * Sayang ka pangkua jo tambilang

Nan bancah tanami baniah * Kolam dibuek di nan lakuang
Nan kareh buek ka ladang * Pabanyak itiak jo ayam
Pagapuak jawi jo kabau * Dapek marancah tangah sawah

Kokoh jo alaik jo pakakeh * Tau dimakan mato bajak
Tau disingka nan bapiuah * Babadan batulang kuaik
Indak katalok tu dek ambo

Kalau ka jadi rang panggaleh * Lah jaleh bapokok banyak
Panuruik pakan katujuahnyo * Nan tau jo labo rugi
Jaleh harago turun naiak * Pandai manahan angek dingin

Bagarak bareh di Piaman * Awak lah tau haragonyo
Walau bak mano pasakitan * Indak karusak rumah tanggo

Liek pandangi lah dek mandeh * Di dalam koto nagari ko
Gak surang ndak ado rang mangaleh * Sabab tapacik dek rang kayo

Kok ambo jadi dubalang * Nan tagak di pintu mati
Kabenteang dusun jo taratak * Kapaga koto jo nagari
Manjago urang lalu linteh

Siang lalok malam bajago * Nan pandai lalok sadang tagak
Bisa makan sadang balari * Karih tacabuik musuah tibo
Padang ta-ayun lawan datang * Nak aman koroang jo kampuang

Kalau diagak jo pikiran * Indak nan talok ciek juo
Ka ayah jo mandeh disarahan * Apo karajo untuak ambo
Ma-alum mandeh tantang itu.

MANDEH UMBUIK MUDO (8-1)
Kalau lah itu nan tacinto * Ka kami rundiang disarahan
Antah kok angan mandeh sajo * Nak kanduang cubo simak-an
Cari pusako nan tak habih * Pakai-an nan tak kalapuak
Talago nan tak namuah panuah * Bulak-an nan tak namuah kariang
Diaru mangkonyo janiah * Dilalah ka pucuak bulek
Nak basuo jo urek tunggang * Kalilah kaurek tunggang
Nak basuo jo pucuak bulek * Itu nan patuik Buyuang cari

Buyuang oi pailah mangaji * Dilahia silek nan ang tuntuik
Dibatin carilah ilimu * Samo dicari kaduonyo
Tuntuik ilimu sajak ketek * Dari kini sasai untuang
Sasa kudian tak paguno

UMBUIK MUDO (9-1)
Walau kok indak mandeh suruah * Lah itu juo nan diangan
Bogo lun sampai ambo rangkuah * Lah raso di tapak tangan

Ambo danga kato mandeh tadi * Duo jo diri ayah kanduang
Adok kabadan diri ambo * Pikiran baiak nan lah tumbuah
Mupahum kokoh nan lah timbua * Pado wakatu iko kini
Kutiko pikiran suni * Indak dibimbang jo nan lain

Kalau pikiran hati ambo * Lah tigo tahun sampai kini
Tunjuak sakik kalingkiang damam * Jari manih tagamang-gamang
Haram nan lain buah angan * Niaek baguru nan tabayang

Kini baitu hanyo lai * Mamintak ambo ka mandeh
Bakandak ka ayah kanduang * Kato sapatah tando suko
Rundiang sabuah tando rila * Lapeh lah ba-a badan ambo
Baguru silek jo mangaji

AYAH UMBUIK MUDO (10-1)
Manolah Buyuang Umbuik Mudo * Nak kanduang sibiran tulang
Kalau lah itu nan tacinto * Kami nan indak kamalarang

Kok hanyo itu nan diangan * Kapado kami baduo
Anak mamintak karila-an * Lai ka buliah nan dicinto

Kami lapeh jo hati suci * Elok kini Buyuang bajalan
Baolah baka sacukuiknyo * Untuang basuo nan dicari
Jo doa kami mairiang-an * Kito bacarai kini nangko

Hap…Tah ...Tih …

GURINDAM LEGARAN 2
Kandak buliah pintak balaku, sanang rasonyo kiro-kiro, dapek pangaja dari ayah, niaik sangajo pai baguru, lalu bajalan si umbuik mudo, tinggalah mandeh nan di rumah. Nan satibo di rumah guru, untuang kabaiak ditarimo, baguru silek jo mangaji. Sampai basuo bahadapan, bajawek salam maso itu, sadang ba-andai bapaparan.

Hap …Tah …Tih …

Keterangan
Kato-kato guru jo anak murik nan di bawahko, buliah ditambah jo kato-kato spontan asah lai sasuai jo maso nan sadang baguru, atau sahabih kato-kato nan dibawahko, si Umbuik Mudo di aja lansuang dek gurunyo buliah juo.

UMBUIK MUDO (11-2)
Manolah ayah janyo ambo * Bagala angku Panjang Jangguik
Dek ayah jaweklah salam * Mangko tibo ambo kiniko
Gadanglah niaik jo mungkasuik * Buruak baiak nak ayah ganggam

Ambo dilapeh ayah bundo * Nyo suruah ambo kamari
Namo ambo si Umbuik Mudo * Dari kampuang Aua ambo tadi

Ambo taniaik nak baguru * Baguru silek jo mangaji
Rundiang di ambo hinggo itu * Dek ayah kandak nak babari

PANJANG JANGGUIK (12-2)
Kalau baitu kabaiaknyo * Niaik basilek jo mangaji
Lai kabuliah nan dicinto * Pasanang sajo dalam hati

Bisuak pagi pukua sambilan * Matohari koklah mambungo
Di sinan Buyuang dimandian * Baitu juo nan biaso

Barakaik limau nan sadidih * Buyuang kamandi jo bakasai
Mamintak pado nan kuaso * Asah indak ma-abih barih
Tiok manitiak Buyuang tanai * Lamo lambek kapanuah juo
Kini baitu hanyo lai * Dek hari lah laruik malam
Kito tanangan lah daulu * Rundiang to gantuang jo Fatiha.

Hap…Tah ...Tih ...

GURINDAM LEGARAN 3
Kato putuih paham saukua,sanang hati si umbuik mudo, mulai mangaji hanyo lai. Salamo Umbuik mangaji, lai bak pucuak dilanca-an, indak ado maro nan malintang. Nan dek capek putaran maso, rasolah panuah disukatan, lah tigo tahun nyo baguru. Bujang diimbau dek gurunyo, cinto maagiah kaputusan, sadang barundiang maso itu...

Ap …Tah …Tih ...

Keterangan
Dari mulai baguru si Umbuik Mudo indak kito caritoan, caro balimau indak kito caritoan, hanyo disampai-an sajo jo lagu baraso lah tigo tahun Umbuik Mudo baguru, kutiko Umbuik Mudo diimbau guru inyo sadang duduak di dalam legaran, lah kanai imbau dek gurunyo baru tagak, buliah mambuek langkah silek joloang basuo jo guru sambia manyambah, atau maunjuak-an salam kagurunyo, tantu sajo dajawek pulo dek gurunyo.

PANJANG JNGGUIK (13-3)
Manolah Buyuang Umbuik Mudo * Nan cadiak bakalang bana
Pado wakatu kini nangko * Ado di denai nan takana
Nan takana sajak daulu * Tapikia dalam kiro-kiro
Salamo Buyuang baguru * Buyuang nan tingga di rumah ko
Ayah bilang-bilangan hari * Dietoang-etoangan bulan
Dek capek putaran maso * Habih bulan baganti tahun

Kalau tak salah agak denai * Dicubo mahetoang musim
Lah tigo tahun pananggalan * Buyuang baguru jo ayah ko

Lah banyak kaji nan dapek * Kok silek baitu pulo
Diaja ciek dapek ampek * Sisiak bana nan samparono

Tiok bakandak lai buliah * Siang malam kito basurah
Nak tau digadang baniah * Tantu diasaknyo kasawah
Rasio tuhan mangatokan * Antaro murik jo guru
Nan bak umpamo buah ranum * Raso lah masak di paraman
Lah patuik kaji baputusi

Carai sabulan lah dicubo * Kini bacarai tigo bulan
Indak buliah kito basuo * Sasudah bajawek tangan
Batulak pungguang tu namonyo * Kok untuang ijab dibukak-an
Ba-apo pikiran Buyuang

UMBUIK MUDO (14-3)
Oh guru ampuni ambo * Barilah maaf banyak-banyak
Kalau baitu kabaiaknyo * Ambo nan indak kamanulak

Sababkan ba-a dek baitu * Kalau dibadan diri ambo
Asah pitua dari guru * Nan ambo manuruik sajo

Kamano loyang bakelok * Kelok lilin lah kian pulo
Apo nyo guru nan ka elok * Ambo lah suko manarimo

Nak panuah bana bak basukek * Uleh nak tibo digunjainyo
Ambo mintak kaputusan silek * Nyampang kito bacarai lamo.

PANJANG JANGGUIK (15-3)
Itu bana denai pikiakan * Nak samo dapek kaduonyo
Melah to turun kahilaman * Kutiko elok nan lah tibo

Adaik limbago rang mangaji * Kariang salubuak bak manimbo
Lai ka buliah kandak hati * Nak jaleh hitam putiahnyo
Kito kabawah hanyo lai.

UMBUIK MUDO (16-3)
Kalau baitu kato guru * Nan ambo manuruik sajo
Melah to turun kahilaman

Keterangan
Untuak pindah kahilaman antaro guru jo si Umbuik Mudo, dianta jo tapuak tangan sajo atau jo galombang nan indak pakai lagu, Umbuik Mudo mampakameh diri untuak mamutuih-i silek jo gurunyo angku syeh panjang jangguik, dalam mamutuih-i silekko buliah ditambah jo kato-kato spontan, tapi jan lari dari kondisi kito nan sadang baguru, dek karano si Umbuik Mudo alah manyalasai-an ilimu batin nan dituntuiknyo, sudah mamutuih-i silek, Umbuik Mudo lansuang mintak karila-an ka gurunyo untuak pulang ka kampuang.

UMBUIK MUDO ( 17-3)
Manolah guru nan budiman * Nan bijak bakalang budi
Silek alah ayah ulangan * Lah pandai mambaco kaji

Sabalun batulak pungguang * Mamintak ambo ka ayah
Kato sapatah tando rila * Rundiang sabuah tando izin
Cinto nak balaik ka nagari * Lapeh dek ayah badan ambo.


PANJANG JANGGUIK (18-3)
Kalau lah itu nan taragak * Kaji kan alah baputusi
Walau pun indak Buyuang mintak * Dek ayah rila lah babari

Hanyo sabuah pasan ayah * Kalau katingga dalam kampuang
Kutiko sadang takunci * Baiak takunci disasaran
Usah dibukak jo tanago * Ambiak angok rintang jo umpan
Garak garik palungga kabek * Disinan kunci mangko lapeh

Walau takunci ateh balai * Kito takunci dalm rapek
Usah diguluik digalosang * Capek kato jan dikatoan
Katapian paham nan jaek * Disintak paham nan pandoroang

Pikia nan palito hati * Pueh ditungkuik talantangan
Budi manumpu ka ilimu * Nanang nan baribu aka
Sadang tananang bana datang * Paham lah timbua sandirinyo

Indak ado karuah nan ndak janiah * Indak kusuik nan ndak salasai
Sapueh silang jo salisiah * Datang bana samo badamai

Kini baitu hanyo lai * Jawek salam Buyuang pailah
Kito kan batulak pungguang * Samo to mintak pado allah
Salamaek sampai di kampuang * Kito bacarai hanyo lai

Hap ...Tah …Tih…

Keterangan
Umbuik Mudo jo gurunyo bajalan/bacari batulak pungguang, tantu sajo kalau si Umbuik Mudo kalua kakida si guru kalua kasuok, dek karano kato-katonyo batulak pungguang.

GURINDAM LEGARAN 4
Dek yakin umbuik mangaji, pangana sadang dikarajo, lah sudah kaji baputusi
nyo mintak izin ka gurunyo. Izin dapek batulak pungguang, lalu bajalan nyo sakali
takana mandeh nan dikampuang, sadang mangapolah tu kini. Nan lah tibo umbuik di rumah, hari sadang barabuik sanjo, sudah makan malapeh angah, mandeh batanyo sakutiko

Hap…Tah... Tih ...

MANDEH UMBUIK MUDO (19-4)
Nak kanduang balahan diri * Oh Buyuang sibiran tulang
Lai koh dapek nan dicari * Adokoh maro nan malintang

Sabab baitu kato mandeh * Alah sabulan sampai kini
Darah mandeh tasirok-sirok * Pangana hilang-hilang timbua
Tiok sanjo acok tamanuang * Sabuah indak nan tapikia
Pikiran lapeh tiok hari * Kalaupun ado nan tapikia
Hanyo mamikia adiak Buyuang * Salamo anak tingga-an
Si Ranbun kini lah gadih * Kok muko lah tampak roman
Tingginyo lah bak diambuang * Ibaraik bungo joloang kambang

Sadang rancak dipandang mato * Kok kumbang balun lai tau
Kok nyampang lengah badan kito * Kabalungguak hino jo malu

Itu di mandeh nan tapikia * Pangana kakian juo
Kok basuo niaik jo takadia * Rancak to caro tompangannyo
Ba-apo pikiran Buyuang.

UMBUIK MUDO (20-4)
Manolah mandeh kanduang badan * Kok hanyo rundiang nan mandatang * Lah tigo tahun mbo bajalan
Indak ado maro nan malintang

Kok hanyo pikiran mandeh tadi * Adaik hiduik itu biaso
Sarahkan sajo ka ilahi * Buruak baiak inyo nan punyo

Indak elok hiduik pancameh * Urang pancameh gadang kanai
Adiak ambo si Rambun Ameh * Inyo nan patuik kito bilai

Rambun Ameh koknyolah gadang * Basamo kito mamikiri
Angin taduah kabuik kok tanang * To cari sangkutan naknyo tinggi
Tantu di mandeh lah tapaham

MANDEH UMBUIK MUDO. 21-4
Nak kanduang si Umbuik Mudo * Sumangek darah nan putiah
Sidingin tampa dikapalo * Sibiran tulang nan salapan
Singkek ndak ado kaulehnyo

Mandanga kato Buyuang tadi * Lah sajuak raso paratian
Bajaso bana anak mangaji * Alah mah kokoh sandi iman

Jikok bak kato Buyuang tadi * Aluran diri si Rambun
To cari sangkutan naknyo tinggi * Nak jan sampai malu batimbun

Kok lengah kito tantang itu * Hino tumbuah cacian datang
Bangso randah cilako dapek * Malu kakito balungguaknyo
Kini baitu nan ka baiak * Dek hari lah laruik juo
Kok capek ayah babaliak * Mandeh katoan kapadonyo
Kito tanangan lah daulu.

UMBUIK MUDO ( 22-4)
Kalau baitu kato mandeh * Nan ambo manuruik sajo
Kok ado singkek nak mauleh * Kito rapek-an rumah tanggo
Ambo kasurau hanyo lai

Hap…Tah ...Tih ...



GURINDAM LEGARAN 5
Kato putuih rundiang baranti, mananti ayah dari surau, basanang hati tiok hati, indak ado manaruah risau. Adolah pado suatu hari, lah anam bulan nyo di kampuang, siriah sakapua tapandangi, darah kamuko lah mandanguang. Siriah apolah itu garan, nan pangana kakian juo, nak sanang darah di badan, tanyolah tibo ka adiaknyo.

Hap…Tah…Tih…

Keterangan
Umbuik Mudo jo si Rambun Ameh samo-samo lah ado dalam legaran, katiko anak randai mambuek galombang silek untuak duduak, sasudah anak randai duduak si Umbuik Mudo jo si Rambun Ameh lah tagak di dalam lansuang bakato-kato.

UMBUIK MUDO (23-5)
Manolah adiak kanduang ambo * Sibunsu nan tak bacabang
Bari luruih ambo batanyo * Jawab di adiak jo nan tarang
Adiak denai si Rambun Ameh * Sapulang denai di tapian
Sudah balimau jo bakasai * Denai sugiro pai pulang

Indakdo lamo antaronyo * Satibo tangah hilaman
Lah mandanyuik ka ampu kaki * Mambaleh katapak tangan
Denai bagageh kateh rumah *
Taruih ka petak padapuran * Ma-ampai anduak nan basah
Sabun lah tibo di tampeknyo * Malengoang denai ka kida
Tampaklah siriah nan sakapua * Talatak ateh carano

Siriah apolah itu garan * Adokoh urang nan mamanggia
Dek adiak cubo tarangkan * Nak jan manjadi buah pikia
Ma alum adiak tantang itu

RAMBUN AMEH (24-5)
Manolah tuan kanduang ambo * Tali adaek kuduang karatan
Kalaulah itu nan taraso * Danga di tuan ditarangan

Ambo di dapua maso itu * Sadang batanak jo manyamba
Bunyi urang manokok pintu * Sampai mbo janguahnyo kalua

Ambo caliak arah ka janjang * Tampaklah urang surang sajo
Ambo bukak pintu nan gadang * Urang nan tibo ambo lupo

Ambo mananyo duo kali * Kironyo angku Panjang Jangguik
Ambo suruah naiak sakali * Banyaklah rundiang nan nyo sabuik

Tuan baguru nan nyo bincang * Mahianyo tuan mangaji
Sudah rundiang nyo rantang panjang * Nyo bukak uncang nan barisi

Baliau tacinto nak baralek * Nyo lapeh kulansiang bulan
Kadalam koto nagariko * Itu sabab inyo kamari
Alek galanggang kanyo pancang * Sabaleh hari bulan timbua
Tuan kanduang nyo suruah datang * Nyo tingga-an siriah sakapua

Inyo baralek tujuah hari * Mancari judu Galang Banyak
Panggilan elok dituruti * Jan awak sajo nan tak tampak
Apo pikiran dari tuan

UMBUIK MUDO (25-5)
Kalaulah itu baritonyo * Lah sunyi dalam paratian
Jokoklah tibo kutikonyo * Bialah denai pai kian

Kini baitu hanyo lai * Nak denai mangganti baju
Sadio-an nasi jo kopi * Rambun kadapua lah daulu

RAMBUN AMEH ( 26-5)
Kalau baitu kato tuan * Iyo pulo itu kironyo
Samantaro tuan katapian * Ambo lah hasia kasadonyo
Lah cukuik nasi jo samba * Sarato aia jo kopinyo
Alah tasusun ateh meja * Tuan nan tingga makan sajo

Hanyo nan pintak dari ambo * Raso gulai kok kurang garam
Atau nasi kareh badatuih * Usah dicacek badan ambo
Sajak ketek gilo manyulam * Gilo manjaik manarawang
Kadapua ikolah baru * Pabilo ambo kapandai
Kok indak dicubo-cubo * Tuan makanlah nan taedang
Ambo kadapua lah daulu.

Hap…Tah …Tih ...

Keterangan
Kalau dapek lagu nan kadibaoan untuak nan dibawahko, adolah lagu (irama) nan bisa ka ampek barihnyo untuak ciek legaran, jadi ampek kali legaran atau ampek kali lagu anak randai alah duduak, tamasuak untuak sadonyo pagu nan ampek barih dalam ciek pantun.

GURINDAM LEGARAN 6
Sudah barundiang jo adiaknyo, umbuik mudo hatilah sanang, kami aliah tujuan kato, si galang banyak kito bincang, dilapeh siriah jo pinang, pamanggia urang di nagari, lah tibo dihari nan dibilang, alek bamulai hanyo lai. Rami alek indak tabado, bahimpun urang nan banyak, bapak mandeh sanang hatinyo, kok untuang dapek jodoh anak. Umbuik Mudo talambek tibo, alek lah rami tigo hari, bajawek salam jo gurunyo, sadang barundiang lah tu kini

Hap…Tah ...Tih ...

Keterangan
Sabalun angku Panjang Jangguik bakato-kato ka si Umbuik Mudo, kalau untuak bamain wakatu lai agak panjang, buliah dimulai jo sagalo bantuak kesenian nan ado di anak randai, kalau wakatu singkek agak ciek sajo kaluan kesenian tu, sasudah tu si Umbuik Mudo bajalan dilua legaran, diimbau dek angku Panjang Jangguik, Umbuik Mudo masuak kadalam legaran, lansuang bajawek salam.

PANJANG JANGGUIK (27-6)
Manolah Buyuang Umbuik Mudo * Laimah datang kamari
Ba-a mangko talambek tibo * Lah tigo hari galanggang rami

Lah kalua pamenan adaik * Kalua aguang jo talempoang
Sarato saluang jo dendang * Pupuik sarunai jo bansinyo
Langkok jo rabab tali ampek * Tari sewa tak buliah tingga
Alah kalua kasadonyo

Kini baitulah dek Buyuang * Buyuang imbau Pandeka Capek
Cubo basilek gak sajamang * Nak sanang hati nan basamo
Ba-apo pikiran Buyuang

UMBUIK MUDO (28-6)
Kalau baitu kato ayah * Dek ambo talambek tibo
Nak ambo cubolah malangkah * Paulang-ulang kaji lamo

Tambilang di rumpun lansek * Tasisik di ruang lantai
Ambo cubo sado nan dapek * Nan tingga untuak rang nan pandai

Samantaro hari balun tinggi * Nak ambo cubo gak sajamang
Duduaklah guru mamandangi * Langkah kok ado banan sumbang

Kini baitu hanyo lai * Ambo imbau pandeka capek
Jan siang bahabih hari * Nak kami cubolah basilek
Sabalah guru samantaro

UMBUIK MUDO (29-6)
Manolah pandeka capek * Kito lah lamo tak basuo
Kito ta mintak basilek * Ganti paulang kaji lamo
Apo pikiran dek pandeka

Keterangan
Pandeka capek tagak sasudah diimbau dek si Umbuik Mudo, tatap sajo dianta jo tapuak tangan paliang kurang, buliah juo ditambah jo kato-kato nan spontan, asah lai sasuai jo pakaro basilek, atau bajawek salam, sudahtu baru pandeka capek bakato-kato.

PANDEKA CAPEK ( 30-6)
Umbuik Mudo urang nan bijak * Kalau baitu kaba bunyi
Nak sanang hati rang nan banyak * Di denai kandak ka babari

Kini lah guru nan manyuruah * Tak mungkin kito kamanupang
Asah samo bapaham taguah * Langkah ka kito rantang panjang

Umbuik daulu lah malangkah * Denai ma iriang dari siko
Lahia jo batin jan batingkah * Kito kok kanai mularaiknyo
Duo baleh cupak usali * Nan tatap kato pusako
Melah to niaik kanan suci * Kok malang ka ba a juo
Melah to cubo gak sajamang

UMBUIK MUDO (31-6)
Kalau baitu kabaiaknyo * Kito bakameh hanyo lai

Keterangan
Katiko si Umbuik Mudo alah mulai malangkah silek, nan sarancahnyo mambuek pagaluik-an/pacakak-an silek agak sakali surang, sasudah itulah Puti Galang Banyak bajalan dilua legaran, darah si Umbuik Mudo lah tasirok dek mancaliak rancaknyo Puti Galang Banyak, kutiko si Umbuik Mudo sadang mamintak dalam basilek, talayang caliak si Umbuik Mudo sakali lai ka Puti Galangbanyak, awak sadang malengah kaki pandeka capek tibo di dado Umbuik Mudo, mambuek inyo tajatuah, tibolah cacek dek puti Galang Banyak.

GALANG BANYAK ( 32-6)
Lah hilang garak jo garik * Lakek kaki tibo di dado
Hati pandeka lah takilik * Dek ulah pandang nan cilako

Baburu ka padang data * Dapeklah ruso balang kaki
Baguru kapalang aja * Bak bungo kambang tak jadi

Bantuak lai bantuak sipuluik * Ditanak badarai juo
Elok capek babaliak suruik * Alek ko alek urang kayo

Kana daulu untuang diri * Ambiak camin pandang lah rupo
Mangko ditampuah galanggang urang * Usah dicinto lai nak mandi
Jaleh kapayah harok sajo * Mancaliak janiah sumua urang

UMBUIK MUDO (33-6)
Oh Galang Banyak nan jombang * Indak elok urang pambangih
Usah muluik tadoroang lancang * Sasa kok jadi buah tangih

Nan sakik iyolah kato * Nan padiah iyolah rundiang
Dek nan tajam biaso luko * Bedo kok putuih dinan gantiang

Sungguah ambo urang marasai * Galang tapacik dinan ado
Kok nyampang singkek ndak tabilai * Kayo tak ado kagunonyo

GALANG BANYAK (34-6)
Kato usah doroang lompatan * Elok batulak jauah jauah
Alek kami alek bangsawan * Manga mangko sampai ditampuah

Indak didanga baritonyo * Iko nan Puti Galang Banyak
Tasabuik kamano-mano * Puti batujuah badunsanak

Kayo tasabuik di nagari * Tatuah kamano-mano
Ramah gadang sambilan ruang * Sapuluah jo padapuran
Sabaleh jo anjuang tinggi * Lumbuang balirik di halaman
Sawah batumpak dinan data * Ladang babidang dinan lereang
Mamutiah jawi tangah padang * Mahitam kabau dukubangan
Sidayang duo kali tujuah * Panginang tigo kali lapan
Budak den sakarek koto

Kini baitu hanyo lai * Usah ang lamo di siko
Rancak batulak kini kini * Ka runtuah adaek jo pusako
Suto jo ganiah ndak saragi

PANJANG JANGGUIK (35-6)
Anak malang anak cilako * Usah bakato nan bak kian
Jan lai kau barundiang juo * Kato kok jadi sadu sadan

Sajak tadi denai danga-an * Kato kau lalu lalang sajo
Indak kau turuik pangajaran * Tuah tak tampak diruponyo

Urang basilek nan kau cacek * Kayo balindak kau panggak-an
Elok nan baiak kau pabuek * Dapek pitoloang dari tuhan

Siang jo malam lai baganti * Kok kunun barih jo takadia
Kito kan hanyo manapati * Kato kalua tak kau pikia

UMBUIK MUDO (36-6)
Oh guru nan baiak baso * Tak elok talampau berang
Agak taheran hati ambo * Nan tak basalah nan batimbang

Ambo basilek nan tak pandai * Rundiang si Galang iyo pulo
Nak capek kusuik ko salasai * Elok lah pulang badan ambo
Ambo bajalan hanyo lai

Hap…Tah ...Tih ...

Keterangan
Angku Panjang Jangguik jo si Umbuik Mudo kalua dari legaran, dianta jo tapuak tangan, ayah si Galang Banyak masuak ka dalam legaran, langsuang bakato-kato jo si Galang Banyak.

AYAH SI GALANG BANYAK (37-6)
Mano kau si Galang Banyak * Sajak tadi ayah danga-an
Lah cadiak bana ka-au kini * Cadiak ka sia kau baguru
Pandai ka sia kau baraja * Lah bijak bana kau mangecek

Kana dek kau samaso dulu * Samaso dalam buaiyan
Rangik saikua waden kajuik * Langau saikua den halau-an

Barulang kali nan baitu * Tiok sabanta mambuai-an
Kironyo hari ampiang siang * Lah tabik pija di timua
Sudah kami sambayang subuah * Mandeh kau pai ka dapua
Kopi tajarang nasi masak * Salasai makan jo minum

Mandeh kau pai kabalai * Waden lah pai ka ladang
Mancari baka untuak hiduik * Alun kariang paluah di kaniang
Guno jo iko ka kau baleh * Ayah ndak suko tantang itu

Kini baitu hanyo lai * Ka-au kok indak namuah suruik
Sasek ndak namuah kau kumbali * Nak bak mancukia banang kusuik
Tantu jo api manyudahi *
Kok itu di kau nan katuju * Bialah ayah bajalan
Pulang ka kampuang ayah dulu * Pado mangusuik paratian

GALANG BANYAK (38-6)
Manolah ayah kanduang badan * Iyolah salah ambo tadi
Mandanga ayah ka bajalan * Bak bunyi patuih tangah hari

Kini ambo mamintak ampun * Dari muluik sampai ka hati
Sapuluah jari ambo susun * Indak ka ambo buek lai

Kok hanyo tingkah ambo tadi * Dek geneang langkah tajambo
Dek congkak lah lupo diri * Pangaja ayah lupo pulo
Hanyo nan pintak dari Galang * Tapijak dibaro hitam tapak
Tandonyo putiah tahan sasah * Kumuah dek abu kito gantiak
Sasek suruik talangkah kumbali * Pulangnyo kabalabeh juo

Kini ambo mamintak ampun * Ayah oi nambek lah bajalan
Sapuluah jari ambo susun * Ampuni sagalo kasalahan
Ba-apo pikiran ayah

AYAH SI GALANG BANYAK (39-6)
Nak kanduang si Galang Banyak * Upeh racun hati jo jantuang
Sumangek darah nan putiah * Sibiran tulang nan salapan
Tanpa sidingin di kapalo * Jiko bak kato Galang tadi
Iyo pulo itu kironyo * Sasek suruik talangkah kumbali
Pulangnyo kabalabeh juo * Nan bak papatah kato bida

Dago dagi mambari malu * Sumbang salah laku parangai
Tapati kato nan daulu * Mangkonyo kusuik kasalasai
Nan pintak di badan ayah * Buek sahinggo iko ka ateh
Paralu anak pahami * Usah sapantun bungo malua
Kutiko tampuak lai bagatah * Wakatu badaun rimbun
Babungo di ujuang rantiang * Rang gatia jo jari manih
Disalo sanggua balatak-an * Jikok iradaek mangandak-i
Kok kucuik bungo nan kambang * Tapuak nan taguah koknyo layua
Jatuah baerak di halaman * Rang tundo jo sapu lidi
Baguluik masuak palambahan * Badan indak paguno lai

Itu nan usah anak pakai * Gadih indak tau diuntuang
Pandai mangguyu jo manjujai * Jadi sabutan dalam kampuang

Pakai lah gadih bapusako * Nan sapantun jo bungo cangkeh
Babungo di ujuang rantiang * Ditanai daun nan banyak
Jikok tibo maso-masonyo * Nyampang lareh digoyak angin
Gadang ketek sato mancari * Tuo jo mudo mangampuangan
Kok tajajak kapasa rami * Bagaluik kilo jo timbangan
Awak ketek harago maha * Sarik buliah maha dibali
Batanyo mangkonyo ado * Bamintak barunyo dapek
Itu nan patuik anak turuik * Banamo gadih bapusako
Walau ba-a cobaan hiduik * Indak karusak rumah tanggo
Alah kajaleh tu nak kanduang

GALANG BANYAK (40-6)
Manolah ayah kanduang diri * Nan mambimbiang ambo salamo ko
Sungguahlah sanang dalam hati * Mandanga pangaja ayah cako

Ambo simpan di dalam batin * Siang malam jadi padoman
Caliak lahia rasoi batin * Ambo nan taguah jo janjian
Ka ayah juo pulang kato

AYAH GALANG BANYAK (41-6)
Nak kanduang balahan tubuah * Si bunsu imbauan urang
Kalau alah bapaham taguah * Hati ayah rasolah sanang
Kalau lah lapeh dari rusuah * Di sinan dunia kito kambang

Pado wakatu iko kini * Dek hari lah laruik juo
Rundiang di siko dihabisi * Kito tanangan samantaro
Ayah ka dalam hanyo lai

Hap…Tah …Tih ...

GURINDAM LEGARAN 7
Rundiang putuih kato saukua, sananglah hati timba baliak, pangaja ayah batarimo. Mano panonton nan budiman, kito caliak si umbuik cako, ampia tibo tangah halaman. Satibo umbuik di rumah, dima duduak bamanuang juo, tarumuak raso paratian. Alun dapek hati talengah, mandeh batanyo sakutiko, panonton mari kito dangakan

Hap …Tah …Tih …

MANDEH UMBUIK MUDO (42-7)
Nak kanduang si Umbuik Mudo * Balahan diri batang tubuah
Apokoh garan nan maibo * Dek pulang bahati rusuah

Kanai cacek anak di galanggang * Mangko duduak bamanuang juo
Atau dunia kalah dek urang * Tahimpik taruah dek nan kayo
Rusuah lah tampak manunai * Kamuko tampak mambayang
Lah patuik hanyuik bapintesi * Jawek dek anak buah andai
Usah baliku dinan tarang * Nak dapek mandeh mamikiri
Nak kanduang jawab lah sugiro

UMBUIK MUDO (43-7)
Kalau itu nan mandeh tanyo * Danga di mandeh jo nan tanang
Guru ambo datang ka iko * Nyo panggia ambo ka galanggang

Tadi pagi ambo bajalan * Lai dilapeh dek si Rambun
Ulah mato cilako badan * Kabakeh malu batimbun

Satibo ambo disinan * Guru mintak ambo basilek
Lah sudah langkah pambuka-an * Niaik mamacah langkah ampek

Baru mambukak langkah tigo * Langkah nan kida ka diasak
Tasirok darah di dado * Mancaliak Puti Galang Banyak

Lawan nan indak di acuah-an * Lah lakek kaki kadado
Paham di hati lah ta-angan * Tak namuah hilang di mato
Mancaliak ambo kanai kaki * Tibolah cacek dek si Galang
Kini baitu hanyo lai * Dek mandeh cubo lah pinang

Pinang lah gadih Galang Banyak * Untuang kok lai kasasuai
Sampai kan pasan dari ambo * Kabek sabalik buhua sentak
Rapek nagari nak ma ungkai * Dek kito kok lai tangga sajo

Itunyo kato nan ta unjuak * Mandeh oi pailah sugiro
Tangih kok lai mandeh pujuak * Bara ka sanang kiro kiro

MANDEH UMBUIK MUDO (44-7)
Kalaulah itu nan tacinto * Mancinto baiak paruntuangan
Pasanang sajo kiro kiro * Bialah mandeh marundiangan

Tanang tanang Buyuang mananti * Kito ma-angan bungo kambang
Untuang kok lai batapati * Timba baliak hati nak sanang

Ba-alah nan iko kini * Di siko rundiang disadangan
Barisuak bajalan mandeh pagi * Kok untuang dapek nan diangan
Kito bacarai hanyo lai

Hap ...Tah ...Tih ...

GURINDAM LEGARAN 8
Rundiang sudah kato sasuai, lah samo sanang dalam hati, asa nyo niaik lai ka sampai, lamo jo lambek ka dinanti. Dek diri mandeh Umbuik Mudo, mandeh rubiah nyo singgah-i, siriah di uncang dikapiknyo, baitu adaik nan tajali. Bajalan juo maso itu, mambaok pasan dari anak, niyaik maminang nan nyo aju, iyo lah Puti Galang Banyak. Lah tibo di laman rumah, paluah di kaniang lah marebak, alun taraso lapeh payah, maimbau mandeh Galang Banyak.

Hap…Tah ...Tih ...

Keterangan
Mandeh si Umbuik jo Mandeh Rubiah dilua legaran, Mandeh si Galang Banyak dalam legaran lansuang maimbau kapado mandeh nan baduo dilua legaran.
MANDEH GALANG BANYAK (45-8)
O Mandeh si Umbuik Mudo * Mandeh Rubiah nan baiak budi
Di halaman kakak jan lamo * Itu cibuak basuahlah kaki

MANDEH UMBUIK MUDO (46-8)
Mandeh si Galang nan budiman * Ambo jawek rundiang nan sapatah
Dek tagak kami di halaman * Disangko adiak ndak di rumah

Gadang sangajo jo mungkasuik * Mangko kami tibo di siko
Walau kok indak adiak tuntuik * Namun kami ka naiak juo

MANDEH GALANG BANYAK (47-8)
Putiah kapeh nan samo nyato * Putiah hati baka-ada-an
Di rumah kito bacarito * Lapiak lah sudah dibantangan

Hap …Tah ...Tih…

Keterangan
Untuak ma-anta mandeh rubiah jo mandeh si Umbuik Mudo masuak kadalam legaran, mako paralu dibuek galombang indak pakai lagu atau tapuak banyak sajo kalau wakatu singkek, lah tibo urang nan baduo ko di dalam anak randai duduak baliak, sudah tu mandeh Rubiah mambukak kato (Anak Galombang)

MANDEH RUBIAH (48-8)
Mandeh si Galang nan baiak budi * Nan cadiak nan manih muluik
Paneklah lapeh dek baranti * Lah patuik rundiang ambo sabuik

Mulo salangkah dari rumah * Dilapeh ayah Umbik Mudo
Mambao kato nan sapatah * Sarato uncang jo isinyo

Kami dilapeh niniak mamak * Cukuik sagalo rang sumando
Cinto pikiran kami bukak * Dek adiak tumpuan kato

Uncang barisi siriah pinang * Langkok jo daun jo timbakaunyo
Oh adiak makanlah pinang * Nak dapek manyabuik kato

Oh adiak makan lah siriah * Siriah nyo udang tampak hari
Tampuak nan bagai kuku balam * Tagurabak gagak kainggok
Lantiak bak alang manari * Gagangnyo jawek-bajawek
Dahannyo malingka alam * Baurek tunggang ka bumi
Bapucuak cewang kalangik * Daun malepai ka udaro
Pucuaknyo bulek bak digiliang *

Batahun dalam karateh * Samusim dalam badaman
Niaek mungkasuik naknyo lapeh * Pinto ka adiak diunjuak-an

Nan ta bungkuih di dalam uncang * Adaik limbago kami bao
Dek adiak makanlah pinang * Nak dapek manyabuik kato.

MANDEH GALANG BANYAK (49-8)
Manolah kakak nan baduo * Nan manih muluik panuturan
Kalaulah gugua di tampuaknyo * Siriah jo pinang ambo makan

Ambo makan siriah jo pinang * Baitu adaik nan biaso
Supayo hati samo sanang * Basaba kakak samantaro

Hap... Tah ... Tih ...

Keterangan
Anak legaran atau randai mati bagalombang sajo, indak pakai lagu untuak maanta urang nan batigo duduak makan siriah, sudah anak randai bagalombang kutiko lah duduak baliak, mako urang nan batigo lansuang tagak, mandeh Galang Banyak mulai bakato.

MANDEH GALANG BANYAK (50-8)
Kakak oi juo janyo ambo * Lah habih siriah sakapua
Sarilah naiak ka padoman * Pado bahabih hari juo
Lah patuik mambukak tutua * Bukaklah kato pambaoan

Adaek limbago nan balukih * Cupak usali jan talamun
Jo uncang kakak manyiriah * Arah manjuluak buah ranum

Warih tuak patiah nan sabatang * Sampai kini bapakai juo
Supayo hati naknyo sanang * Sabuik dek kakak nan taraso

MANDEH RUBIAH (51-8)
Adaek limbago nan bapakai * Kok duduak basiriah siriahan
Niyaik mungkasuik naknyo sampai * Ambo bukak kato pambaoan

Ibaraik kato nak batimbang * Tangih taisak adiak pujuak
Adiak manaruah bungo kambang * Kami baniyaik nak manjuluak

Kaadiak kami bakandak * Lah lamo manjadi angan
Nan gadih Puti Galang Banyak * Jo si Umbuik kito patunangan

Itu nan cinto dalam agak * Untuang tasarah ka Ilahi
Cubo lah timbang jo gamak * Lai koh samo dalam hati
Pulang kapado adiak juo

MANDEH GALANG BANYAK (52-8)
Kalau baitu kaba bunyi * Rundiang dari mandeh Rubiah
Sulik di ambo bapambari * Dek ayah si galang ndak di rumah

Kakak kan alah tau juo * Adaik Minang nan kito ganggam
Kurang pareso sio-sio * Kurang ilimu suluah padam

Manolah kakak nan baduo * Nan bijak manjawab andai
Suko bana kami basamo * Putuihnyo di urang kamamakai

Kalau basukek di nan panuah * Kalau mangati samo barek
Asah si Galang Banyak namuah * Buhua ka kito kabek arek

Basaba kakak mananti * Kami rundiangan jo si Galang
Baiak jo ayah jo datuaknyo * Untuang kok lai ba tapati
Timba baliak hati nak sanang * Pulang kapado kakak juo

MANDEH UMBUIK MUDO (53-8)
Kalau baitu parundiangan * Mananti kato Galang Banyak
Alun kabuliah nan diangan * Kato si Galang nan ambo mintak

Kok buliah pintak ka adiak * Imbaulah gadih si Galang
Nak lakek hitam ka nan putiah * Hati didalam naknyo sanang
Jalan luruih nan kami tampuah * Baitu adaek nan bapakai
Ambo mintak sungguah sungguah * Jo si Galang ambo nak baandai

MANDEH GALANG BANYAK (54-8)
Malantiang mahadang tampuak * Tantu kabuah alamaiknyo
Alam takambang jadi guru * Kok buah sajo kakak juluak
Usah manyasa pado ambo * Dek indak adaik nan baitu

Kalau itu nan kakak mintak * Nak tantu hitam jo putiahnyo
Ambo imbau si Galang Banyak * Mananti kakak samantaro

Hap ...Tah ...Tih …

Keterangan
Anak randai mambuek galombang, untuak maanta mandeh Galang Banyak kalua dari legaran, dari lua legaran Puti Galang Banyak masuak, satibo Puti Galang Banyak di dalam, anak randai duduak baliak, Puti Galang Banyak bakato-kato.

GALANG BANYAK (55-8)
Oi mandeh nan baiak budi * Mandeh kanduang si Umbuik Mudo
Ba-a mangko sampai kamari * Dek indak disangko-sangko

Badan ambo tadamam-damam * Mandeh maimbau-imbau sajo
Cubo lah curia jo papakan * Nak sanang darah di dado

MANDEH UMBUIK MUDO (56-8)
Galang Banyak nan baiak budi * Bungo satangkai tangah koto
Niyaiklah lamo nak kamari * Kinilah baru basuonyo

Jo mandeh kami lah barundiang * Rasonyo lai kasasuai
Hanyo mananti kato anak * Nak jaleh tampuak kami jinjiang
Jo anak kami nak bahandai * Cobolah timbang jo gamak
Jalan nan pasa kami tampuah * Uncang barisi kami bao
Mamintak kami sungguah-sungguah * Umbuik Mudo urang ka sumando
Ba-apo pikiran dek si Galang

GALANG BANYAK (57-8)
Kok mandeh datang maninjau * Usah diulang duo kali
Sio sio mandeh tarambau * Batu balumuik talompek-i

Mandeh pikek balam jo pipik * Lah jaleh indak bapadanan
Alun dicubo lah tapahik * Kok kunun tibo dirakuangan

Kok hanyo si Umbuik Mudo * Lonjaknyo labu dibanaman
Bak kacang diabuih ciek * Geleang bak sipatuang hanyuik
Imannyo mipih sakali * Kasawah kaladang anggan
Manggaleh nan bodoh bana * Niyaik baraja indak ado

Pahamnyo sapinteh lalu * Lah rumik ambo manyabuik
Bak karakok tumbuah di batu * Suko ambun mangkonyo hiduik

MANDEH UMBUIK MUDO (58-8)
Oi gadih si Galang banyak * Usah lah itu nan di bincang
Jan lai di etoang nan tak tampak * Kato putuih hati lah sanang

Padiah bana kato si Galang * Sulik mamiliah ciek-ciek
Jan lai muluik tadoroang lancang * Hati kok indak padek amek

GALANG BANYAK (59-8)
Oi mandeh jo den di mandeh * Umbuik Mudo jan di panggak an
Kalau tagisia den ampaleh * Jikok tabao den antakan

Kok gadang si Umbuik Mudo * Waden lah tau digadangnyo
Gadang tabao dek lingkaran * Jikok tingginyo si Umbuik Mudo
Waden lah tau ditingginyo * Tinggi tabao dek ruehnyo

Kok rancak si Umbuik Mudo * Rancak dek kain rang basalang
Kok kayo si Umbuik Mudo * Kayo dek ameh pambaoan
Pambaoan dari bapaknyo * agalang kaki den alun sampai

Usah diulang duo kali * Jan lai di sabuik sabuik juo
Maramang bulu kuduak den * Rueh jo buku tak basuo

MANDEH UMBUIK MUDO (60-8)
Galang Banyak usah baitu * Nan indak-indak upiak bincang
Jauah kadalam tasisiknyo * Kok tak basuo rueh jo buku
Bialah nak kami pulang * Nak den katokan kapadonyo
Mandeh bajalan hanyo lai.

Hap …Tah …Tih …

GURINDAM LEGARAN 9
Rundiang putuih kato batimbang, lah pulang lah ampo tangan, rundiang di tulak dek si galang, malu nan indak tabadoan. Kok hanyo mandeh si Umbuik, nyo bapikia sadang bajalan, rumik rasonyo ka manyabuik, aduah ba-alah mangato-an. Lah tibo mandeh maso itu, langsuang naiak inyo sakali, umbuik manyongsoang hinggo pintu, gak rusuah mandeh nyo pandangi, dek sulik raso manahan, tanyo lah tibo ka mandehnyo, mano panonton nan budiman, mari to danga baritonyo

Hap …Tah ...Tih …

UMBUIK MUDO (61-9)
Manolah mandeh kanduang diri * Bari maaf ambo bakato
Basuokoh garan nan dicari * Laikoh dapek nan dicinto

Dek mandeh cubo katokan * Nak sanang darah di dado
Elok buruak cubo lahiakan * Usah mandeh baduto-duto

MANDEH UMBUIK MUDO (62-9)
Nak kanduang balahan diri * Ubek jariah yaha jo bapak
Disuruah mandeh lah pai * Maminang Puti Galang Banyak

Mandeh si Galang nan bakato * Dek inyo tumpuan sambah
Mandeh alah balangkah hampo * Dek kito sayuik salangkah

Kok hanyo Puti Galang Banyak * Lah sudah batimbang tando
Kabek sabalik buhua sentak * Lah sulik raso maungkainyo

Inyo nan alah batunangan * Jo urang kampuang inyo juo
Kami pulang ba hampo tangan * Dek urang alah bapunyo

UMBUIK MUDO ( 63-9)
Manolah mandeh kato ambo * Indak itu kato si Galang
Usah mandeh baduto-duto * Mandeh manyuruak di nan tarang

Nan didanga toloang katokan * Nak sanang darah dibadan
Nak tantu jalan kadituruik * Mandeh sugirolah kato-an

MANDEH UMBUIK MUDO (64-9)
Dek yakin Buyuang batanyo * Mandehlah suko mangatokan
Usah Buyuang salah tarimo * Kalau tasabuik di nan bukan

Nan kato si Galang Banyak * Kapado badan diri mandeh
Kok hanyo si Umbuik Mudo * Usah disabuik duo kali
Kalau tagisia den ampaleh * Jikok tabao den antakan

Kok rancak si Umbuik Mudo * Rancak dek kain rang basalang
Kok kayo bana Umbuik Mudo * Kayo dek ameh pambaoan
Pambao-an dari bapaknyo * Kagalang kaki den indak sampai
Itu katonyo bakeh mandeh

UMBUIK MUDO (65-9)
Kok itu kato si Galang * Bara ka sulik mahilangan
Malipua jajak tasindoroang * Mungkin sangketo kabalamo
Dandam ka dibao mati * Berang ka-sampai ka-akirek

Kini baitulah dek mandeh * Parintang hati nan bimbang
Paragu hati nan rusuah * Mandeh toloanglah badan ambo
Mancari purupuak hanyuik

Eten ka Lubuak Mato Kuciang * Nan dililik dek nago sati
Nan dipaluik dek ula bidai * Denai tacinto nak babansi
Itu nan cinto dalam agak * Kini juo mandeh bajalan

MANDEH UMBUIK MUDO (66-9)
Kalau baitu kato anak * Kini juo mandeh bajalan
Sabalun barembang patang * Hati mandeh bacabang indak
Asah lai dapek nan diangan * Tolong jo doa dibalakang
Mandeh bajalan hanyo lai

Hap …Tah ...Tih ...

GURINDAM LEGARAN 10
Lah bajalan mandeh si Umbuik , bajalan ka tapi rimbo, langkah diayun suok kida, maranyai paluah dikaniang, pai mancari talang hanyuik. Dek lamo lambek bajalan, tinggi bukik lah didaki, dalam lurah alah dituruni, hampia ka tibo hanyo lai, iyo di Lubuak Mato Kuciang. Satibo inyo disinan, dibaka kumayan putiah, mamintak inyo ka nan satu, pintak lai ka nan buliah, dapeklah talang maso itu. Talang dapek babaliak pulang, ditarimo dek Umbuik Mudo, lalu dibuek bansi pitunang, bansi sudah inyo bajalan, sadang babansi nyo tu kini

Hap … Tah ...Tih ...

Keterangan
Si Umbuik Mudo sadang babansi, duduak surang ditangah legaran, mambalakang katampek si Galang Banyak masuak, bansi baranti kutiko alah tadanga suaro si Galang Banyak.

GALANG BANYAK (67-10)
Bari luruih ambo batanyo * Maaf taunjuak pado tuan
Bansi apo itu namonyo * Nyo imbau ambo katapian

Sungguahnyo bansi tuan ambuih * Bagarak tubuah jo rohani
Hati jo jantuang bak kaputuih * Sabab mandanga bunyi bansi

Di siko hati mangko risau * Iman nan taguah diragunyo
Bunyi bansi raso maimbau * Tuan diruang mato juo

Itu sabab ambo kamari * Bunyi bansi maibo ibo
Supayo sanang dalam hati * Dek tuan jawek tanyo ambo

UMBUIK MUDO (68-10)
Galang Banyak nan baiak budi * Manga disapo dagang hino
Mangkonyo ambo dek babansi * Dagang takana jo untuangnyo


Takana di untuang malang * Bak batu jatuah kalubuak
Rancak dek kain rang basalang * Gadang dek bareh rang ba anduak
Rancak dek baju rang basalang * Licin dek minyak rang bamintak
Apolah katenggang anak dagang * Awak mancaliak rang mailak

Untuang buruak tibo diambo * Kalau tabao rang anta-an
Kok kayo bana badan ambo * Kayo dek ameh pambao-an
Ka galang kaki adiak balun sampai * Bansaik balabiah dari urang
Itunyo kato dagang sansai * Alah ka sanang hati Galang

GALANG BANYAK (69-10)
Nan lamo usah disabuik * Jauah taibo hati ambo
Taduah hujan taranglah kabuik * Tando babudi baiak juo

Ambo kok sasek tak disangko * Tadoroang muluik maso itu
Tuah ndak tampak diruponyo * Kinilah ambo baru tau

Dek litak ambo lah takasa * Dek mamang ambolah tarabo
Bukan dek ayah tak ba aja * Manjo maso ketek nan tabao

Kini kito bakarila-an * Salah katuan salamoko
Ambo nak mintak dimaafkan * Dek tuan mintak batarimo

Nak jaleh kusuik ko salasai * Maaf ka tuan dipuhunkan
Jo maaf utang kok indak lansai * Badan jo nyawo wak sarah-an

UMBUIK MUDO (70-10)
O Galang Banyak nan jombang * Sungguahpun taranglah mancayo
Lai dek ambo nan manggamang * Dek Galang kok sainggo baso

Asah tanamo kato sungguah * Kok sasek biaso suruik
Sansai larek ambo lai namuah * Kok kunun jatuah kabasambuik

Tapi di denai nan manyusah * Dek adiak urang bangsawan
Galang oi suruik lah salangkah * Usah lah langkah ditaruihan

Kalau disambuik dagang hino * Malu tumbuah cacian datang
Bangso randah cilako dapek * Adiak tabao buruak pulo
Niniak mamak dapek malu gadang * Mandeh jo ayah kanai upek

Galang Banyak sanang dianjuang * Rintang jo harum bungo rampai
Ambo ko diseso untuang * Manga disambuik dagang sansai

Lapeh lah dagang nak nyo pai * Oi adiak salamaik tingga
Budi ka ambo anjuang tinggi * Maafkan kato nan talangga

GALANG BANYAK (71-10)
Mandanga kato tuan kanduang * Mambao hati wak ibo
Muluik patah lidah bakungkuang * Tuan tapacik di ulunyo

Tuan manyabuik dagang anyuik * Adiak lai namuah mamintesi
Kok sasek ambo namuah suruik * Talangkah namuah wak kumbali

Ambo susun jari nan sapuluah * Badan ka tuan wak sarah-an
Mamintak ambo sungguah-sungguah * Ambo nan usah ditingga-an

Nan diagak kok indak sampai * Panabusi kato ambo cako
Asah mambao aja sampai * Sakubua kito baduo

Nan nyo hati ambo bana * Ka dikambang kutiko kini
Baru mancaliak tubuah tuan * Tasingik inginan sayang
Tabayang labuahan kasiah * Batawa sakik nan dalam
Tapi ba-alah mangatoan * Iko ruponyo untuang ambo

Pado mamabuak kiro kiro * Umpamo tirih nak bapati
Sampaikan sayang bakeh ambo * Nak jan lamo manahan hati

UMBUIK MUDO ( 72-10)
Kok didanga tangih si Galang * Antah ka ba-a ratok ambo
Manjawek tangan kurang panjang * Santun tak ado kabalehnyo

Kok hanyo nasib badan ambo * Mujua tak mungkin ambo raiah
Sudah suratan nan malangko * Pasang susuik pantai basisiah

Lah patuik barusuah hati * Ganggaman arek nan lah lungga
Suto jo makau nan mandaki * Tasisiah sajo banang bola
Danga di adiak pantun urang * Rami pasanyo Bukiktinggi
Rami dek urang babalanjo * Di pasa teleng kato urang
Katuju bana kato hati * Pamenan bana kato mato
Sayang kasiah ditulak urang

GALANG BANYAK ( 73-10)
Usah baitu tuan bakato * Mambuek paham wak takontak
Dek tuan jawek untuang ambo * Pamujuak tangih nan taisak

Nan diagak didalam hati * Dek tuan cubolah gamak
Di ambo kabek nan lah mati * Dituan buhua nan baurak

Bak aia bacampua minyak * Ciek tampek basisiah pulo
Lah jo tangih ambo mamintak * Tuan bahati bimbang juo

Danga di tuan bunyi pantun :

Anak rajo di Pulau Punjuang * Balahan rajo dari Jambi
Asanyo kuduang jo karatan * Dalam daerah tujuah kampuang
Tuan surang nan tampek hati * Nan lain buliah diharamkan

Danga dek tuan sabuah lai


Lapau ketek ditapi jalan * Nan talatak ditapi tabiang
Babatang limau dilamannyo * Sayang kok indak disampaikan
Ibaraek tagak di nan cupiang * Manaruah gamang kaduonyo

UMBUIK MUDO (74-10)
Oh galang nan manih muluik * Jaweklah salam dagang hino
Apo iko nan adiak sabuik * Badaba darah di dado

Tagamang sandian iman * Bakucak alam saisinyo
Galap gulito pamandangan * Kalau dibadan diri denai

Sajak daulu lah tapaham * Dalam ilimu mambayangnyo
Kok geneang banalah awak * Asah didunia iko juo
Sabalun kapintu lahaik * Banyak cobaan nan manimpo

Hanyo di denai nan maragu * Kalau disambuik dagang hanyuik
Bak ratak panduo kali * Sarupo karam di nan dalam
Kok Galang tacinto juo * Bapasan denai dalam mimpi
Jawek dek adiak jo rasian

Dalam mimpi ambo manyaru * Jo batin adiak manyahuti
Galang Banyak tinggalah dulu * Ambo bajalan hanyo lai

Keterangan
Katiko Umbuik Mudo bajalan sampai di lingkaran anak randai, Galang Banyak mamakiak maimbau… Tuan… Umbuik Mudo baranti tapi indak mancaliak ka si Galang Banyak, lansuang sajo masuak kadalam legaran anak randai, baru gore

Hap ...Tah ...Tih ...

Keterangan
Sadonyo anak randai tagak lansuang bajalan lambek-lambek, sudahtu mambuek gelombang (balabek) juo sangaek lambek, katiko anak randai mulai bajalan jo bagalombang nan lambektu, Galang Banyak maratok sarupo mangecek surang jo pantun nan dibawahko, pantunnyo buliah ditambah jo diganti, sasudahtu galang banyak kalua, anak randai manutuik jo lagu simarantang tinggi jo pantun nan dibawahko, kalau kadituka buliah juo, dek adaek salingka nagari.

GALANG BANYAK (75-10)
Minangkabau barimbo labek * Gunuang Marapi jo Singgalang
Tujuah ratuih carikan ubek * Badan jo Umbuik mangko sanang
Kok lamo bamban di bangko * Si kuriman mandua di baraik
Jiko lamo badan bak nangko * Taguah iman badan mularaik

Oi angin baolah pasan * Oh gunuang tapatan kabuik
Jaweklah ambun nan satitiak * Untuang manjadi anak sungai

Hap ...Tah ...Tih ...
GURINDAM PANUTUIK
Kacimpuang pamenan mandi, rasian pamenan lalok, warih dek datuak nan baduo, kok kurang tajajak tajalani, jo maaf sajo kami atok, ukua jo jangko nan lah tibo. Batusangka balantai batu, bukiktinggi rami pasanyo, payokumbuah tadanga langang, randai sakitu lah daulu, lain maso disambuang pulo, talempoang mairiang di balakang.

Keterangan
Akia dari carito si Umbuik Mudo ko, kalau ditaruihan si Galang Banyak jatuah sakik, dek karano cintonyo ditulak dek si Umbuik Mudo, lamo bakalamoan dek sakik si Galang Banyak indak sanang juo, karano ramuan nan dimintak dek si Galang kapado ayahnyo adolah umbuik nan samo tinggi jo inyo, lah pasai ayahnyo mancari masuak kampuang kalua kampuang, namun umbuik nan samo tinggi jo si Galang tu indak dapek, karano ayah si Galang indak tau baraso umbuik nan samo tinggi jo inyotu adolah si Umbuik Mudo urang kampuang Aua, sasudah si Galang manjalehan kapado ayahnyo, mako dipinanglah si Umbuik Mudo dek niniak mamak si Galang, nampaknyo di siko basuo pulo pitua “adaik dunia baleh mambaleh” pinangan si Galang ko lansuang ditulak dek si Umbuik Mudo, karano daulu pinangan si Umbuik Mudo juo ditulak dek si Galang, dek sangaek manahan hati akianyo si Galang Banyak sampai maningga, mandanga barito si Galang lah maningga si Umbuik Mudo takajuik, tangah malam nyo bangkik kuburan si Galang Banyak dek si Umbuik Mudo, sudahtu nyo lacuiklah si Galang Banyak jo lidi gilo, barakaek pintak katuhan jo tingginyo ilimu batin nan ado dek si Umbuik, sampai si Galang hiduik baliak, baru sudahtu pinangannyo ditarimo, mako kawinlah si Umbuik Mudo jo Puti Galang banyak. ***
Postingan Lama
Postingan Lebih Baru

Posting Komentar

- Advertisment -
- Advertisment -